XİN Avropa İttifaqını Azərbaycanın daxili işlərinə "uğursuz" müdaxilədən çəkinməyə çağırır
Azərbaycan Xarici İşlər Nazirliyinin Mətbuat xidməti idarəsinin rəisi Ayxan Hacızadə Avropa İttifaqının xarici siyasət və təhlükəsizlik məsələləri üzrə sözçüsü Peter Stanonun Azərbaycanda keçirilən növbədənkənar parlament seçkilərini tənqid etməsinə X platformasından cavab verib.
Hacızadə vurğulayıb ki, Azərbaycanda növbədənkənar parlament seçkiləri ölkənin konstitusiyasına və onun milli qanunlarına tam uyğun keçirilib: "ATƏT DTİHB-nin Azərbaycandakı seçkilərlə bağlı mənfi münasibətini təkrarlayan belə subyektiv iddia və siyasi baxış hüquqi baxımdan əhəmiyyətsiz və etibarsızdır".
"Avropa İttifaqının Xarici Fəaliyyət Xidməti rəsmilərini Azərbaycanın daxili işlərinə müdaxilələrinin uğursuz olduğunu anlamağa və bəzi Aİ dövlətlərinin daxili problemlərinə diqqət yetirməyə çağırırıq", - o qeyd edib.
Bundan əvvəl Peter Stanonun yazdığı X postunda deyilirdi: "Azərbaycanda erkən parlament seçkiləri məhdudlaşdırılmış siyasi və hüquqi mühitdə, rəqabətsiz şəraitdə keçirilib. ATƏT DTİHB habelə fərqli səslərin repressiyasının davam etdiyini vurğulayıb. Aİ Azərbaycanı ATƏT DTİHB-in tövsiyələrini icra etməyə çağırır".
ATƏT Azərbaycandakı seçki ilə bağlı ilkin rəyini verdi: "Rəqabətli olmayıb"
ATƏT mövcud şərtlərin seçkilərin demokratik keçirilməsinə imkan vermədiyini deyir
"Təəssüf ki, bu seçkilərdə həqiqi siyasi plüralizm olmayıb, prosesə qatılmaq istəyən saysız namizədlər ciddi əngəllərlə üzləşib, seçki komissiyalarında tərəfsizlik təmin edilməyib, məhdudiyyətlər bir çox vətəndaş müşahidəçilərinin işini mümkünsüz edib", –DTİHB missiyasının başçısı Ditmir Buşati deyib.
"Prosesin effektivliyinə baxmayaraq, bu şərtlər seçkilərin demokratik standartlara uyğun keçirilməsinə imkan verməyib. Biz hakimiyyətə bütün vətəndaşlarının naminə bütövlükdə prosesi təkmilləşdirməkdən ötrü çoxdankı tövsiyələrimizin icrasında dəstək göstərməyə hazırıq", – o vurğulayıb.
Müəlliflər habelə vurğulayıblar ki, bu seçkilərdə hakim Yeni Azərbaycan Partiyasından (YAP) başqa 24 partiya mübarizə aparıb: "Biri istisna olmaqla, hamısı ictimaiyyət tərəfindən "sadiq müxalifət" kimi qəbul edilir. YAP bütün seçki dairələri üzrə namizədləri olan yeganə partiya olduğu halda, digər 24 partiyanın ümumilikdə 181 namizədi var idi".
Əlavə edilib ki, Azərbaycan Xalq Cəbhəsi Partiyası (AXCP) vətəndaşların hüquq və azadlıqlarının məhdudlaşdırılmasını əsas gətirərək seçiciləri boykot etməyə çağırıb: "Hər seçki dairəsində orta hesabla səkkiz namizəd iştirak etsə də, seçkilər rəqabətli olmayıb".