Atamın məzarı önündə düşüncələr
Ağlaya bilmirəm qəbrin önündə -
Göz yaşım gizlicə axır içimə.
Səndən ayrı düşən ağlar günümdə,
Ağlaya bilmirəm, məndən incimə.
Məni ovundurar göz yaşı çətin,
Xəyalım yolundan yığışmır, ata.
O qədər böyükdür sənin həsrətin,
Gözümün yaşına sığışmır, ata.
Ağlaya bilmirəm, bilmirəm üzdə,
Sən - daş sinəlisən, mən - daş ürəkli.
Kölgən ki, var idi başımın üstdə,
Evim sütunluydu, komam dirəkli.
Tükənib taqətim, azalıb gücüm -
Elə bil candərdi yaşayıram mən.
Soyuq torpaq altda yatdığın üçün,
İsti çarpayımda üşüyürəm mən.
Ayrıldın bizlərdən bir qış axşamı,
Əcəl şirin dilli, xoşqılıq imiş.
Yandı qəbrin üstdə ayrılıq şamı,
Ölümün bir adı ayrılıq imiş.
Yuxuya getmisən... yox bir oyadan,
İndi sən hardasan, mən harda, ata?!
"Vətən" deyə-deyə getdin dünyadan,
Qürbət var sən yatan məzarda, ata.
"Azərbaycan" jurnalı
