-
Azər Əhmədov
qış şeiri
Hər səhər
üzərindən keçib getdiyim
bu qar təpəciyi
(zirvəsini fəth etdiyim bütün başqa təpəciklər kimi)
ayağımın altında ovulub töküldü
.
palçıqlı soyuq su
ayaqqabımın içinə dolub
məni üşütdü
.
qış bitdi
yaz şeiri
Bu ilki yaz
səhər saat 8-ə isləmiş
qızımı avtobusla
məktəbə yola salarkən
bir vəhşi qazın
qaqqıldaya-qaqqıldaya
evimizin üstündən keçməsilə
girdi şəhərə
.
ertəsi gün qar yağdı
topuğumdan bir qarış da yuxarı qara batmış
külək qarı sovurub şiddətlə üzümə çırpır
mənsə yenə vəhşi qazın səsini eşitmək istəyirəm
.
qızım deyir sonra biri də gəlmişdi
.
hər tərəf qatı ağ dumana bürünüb
yolumu azmış
dayanıb it kimi ətrafı iyləyirəm
yaz hardasa yaxında olmalıdır
mən vəhşi qazlara inanıram
yay şeiri
Gözləri böyürtkən
sifəti armud
məmələri salxım
ucları qara üzüm giləsi
arxası ərik
bu qadının
çılpaq qollarına
ətli budlarına
və gen sinəsinə
göz gəzdirə-gəzdirə
ən sonda
şirəli dodaqlarına baxıb
öz-özünə bir dəfə
ənnnncirrr deyirsən
və içindən səni isti buxar vurur
yay bax budur!
payız şeiri
Indi payız deyəndə yadıma ən cox
yeddibucaqlı çəkməyim düşür
dama-dama ağ vərəq uzərində
dadlı bir qəhvə içəcəkmiş kimi
ləzzətlə və tələsmədən
yeddi nöqtə seçərdim
sonra da üstünün yazısı pozulmuş
köhnə xətkeşlə
bu nöqtələri birləşdirib
qabarıq yeddibucaqlı alardım
.
yeddibucaqlılar haqda kitablarda suallar az olurdu
onlardan birini indi xatırladım
düzgün ABCDEFG yeddibucaqlısında
1/AB = 1/AC + 1/AD faktını
isbat etmek tələb olunurdu
o vaxt həll edə bilməmişdim
Ptolemey teoremini
ABCE dördbucaqlısına tətbiq etməklə
asanca həll etmək olurmuş
mənsə yəqin ki ABCD-yə tətbiq etmək istəmişdim
.
bilirəm
bu şeirdə hansısa quru yarpaq
yaxud
çəpəki yağan yağış
bunlar banal misallardı söz yox
onda deyək ki heç olmasa qatar vağzalı
yaxud yol kənarında otlayan
hərdən də başlarını qaldırıb adama
dərsdə mənasız sual verib sonra da diqqətlə
gözlərini müəllimə zilləyən
şagirdlər kimi baxan
beş-altı maral
ya da nəsə payıza aid bir şey olmalıydı
amma artıq gecdir
.
qoy oxucuya bircə onu deyim ki
yeddibucaqlını çəkdiyim ağ kağız əslində bir az saralmışdı
külək də həyətdəki zeytun ağaclarını astadan xışıldadırdı
oxucunun özundə də
elə bu şeirin adını oxuyandan
payız haqqında bir-iki assosiasya
yaranıbdır hər halda
mən indi durub da
bunların hamısının əlaqəsindən
detallı-detallı yazsam
şeir çox uzanacaq
qoy oxucu özü
nöqtələri birləşdirsin
