-
Arazın o tayından
Xosrov Barışan
YASAQ MEYVƏ
Qıp-qırmızı bir almadırmı gözlərin?!
Yasaq bir meyvə!
Və sən;
Yam-yaşıl bir ağacsanmı
Ömrümün yayında
Dim-dik duran?!
Və mən;
Bir düşünərmiyəm,
Kölgəliklər sevən bir aydın
Oturub düşünmək üçün?!
Sakit bir məkan.
Və şübhə iblisi hər an
Hər an...
Qaş-göz etməkdə!
Ayrıca xəyalın,
Almanın düşməsidirmi?
Dikəy bir düşüş,
Ansızın təpəmə.
Beynimi yerindən laxladan!?
Və şu düşünər,
Dünyanın dönməsini.
Bilir, bilməsinə də,
Həmişə
Başı döndüyündənmi!?
Ancaq
Tanrının məhkəməsində
Bağıraraq soruşur:
Nədən?
Niyə?
Dünyanın beləcəsinə
Dönməsi gərəkir?!
Bu məhkəmənin hökmü belə,
Neyləyim?!
Anamdan doğulmalıyam,
Üstəlik mən
Zaman adlı ağacın,
Şəhvətinin meyvəsiyəm!!!
Görəsən doğulanda
Ağlamağım
Bir üsyanıydımı?!
ƏGƏR
Çabalayır
Boynu
Aslan ağzında olan bir maral!!!
Tanrı olsaydım,
Yaradardım kainatı
Şeir kimi.
BU İŞ
Gur axan
Bir çaydır bu iş!
Bir qorxmasam,
Özümü atsam.
Yeyin gedən
Bir qatardır bu iş!
Bir qorxmasam,
Bir ona dırmaşsam
Gedə-gedə.
Ancaq çay
Haraya axır?
Haraya gedir qatar?
Bilinməz!
Bilməyirəm.
Yalnız,
Yubanmasam...
Yubanmasam...
(Azərbaycan Yazıçılar Birliyinin "Cənubi Azərbaycan ədəbiyyatı" şöbəsinin dəstəyilə çap olunur)
